1420-08-09 |

Arch Kerkvoogdij Haarlem Inv no 213

Haarlem Algemeen

wy Vranc van Zaenden als voecht van Pieter van Zaenden, clerc, myns zoens, die geprovent is in der parochiekerk van Haerlem, ende Ghysbrecht Dullert, clerc, mede geprovent in derselver kerk, doen cond allen luden, dat wij gegeven hebben ende geven met desen openen brieve, puerlic om Gods willen, heren Dirc Gerit die boghemakersoen, priester, een cappelrie gelegen in de groter kerck van Hairlem voirs, ende gesticht is in die ere Gods ende des H. Geests, ende die nu open geworden is bij dode sheren Dirc Hobbenz, priester, so die gifte ende presentacie ons toebehoert te geven mitter deken van OLVr gilde tot Haerlem, waarom wij presenteren denselven heren Dirc voorn. den eerwaerdigen in Gode den Doemproeste van Utrecht of sinen officiaal, en bidden dat hi hem wil setten in des voors. cappelrie mit sulker solemniteyt als ghewoenlic is. In kennisse der wairheyt so hebbe ic Vranc van Zaenden als een voecht Pieters myns zoens voirn. desen brief bezegelt mit minen zegel. Want ic Ghysbrecht Dullaert voirs. op dese tyd selve geen zegel hebbe, so hebbe ic gebeden Jordyn Claesz, minen vader, desen brief over my te bezegelen. Ende ic Jordyn voirs. hebbe om bede wille Ghysbrechts myns zoens voirn. minen zegel tot enen getuge mede an desen brief gehangen (vgl 1401-10-02, 1401-10-19)