1420-09 - 1420-12 (2) |

R.A.H. Coll Aanw 55 fol 7, 10/Privilegia 1420-1433 fol 3v

Jaartallenindex

(vervolg I) Ende heer Allert voirs. die hadde verdaen ende verteert opten huijse van Haghensteyne 100 £ (des payments in dier tijt) méér dan hij inghenomen hadde, want optie tyt geen renten en waren meer dan 2 hoeven lants die men van den Grave van Ghelre hilt mitten huijse van Hagensteyn. Ende doe en woude des [?] van Brakel sijn vader [aen] heren Allert van den Wale sijn 100£ niet betalen. Des vel optien tijt die Heere van Oosterhout voirs an Heeren Allarde voirs, ende nam dat huys mitten heerschappije tot Hagensteyn tot behoef s Hertogen van Holland, en gaf hem zijn 100£. Een wijl daernae doe nam die heere van Oesterhout voirs een erfdochter van Vyanen, ende warff die van den Hertoghe van Hollandt die heerschappye van Hagensteijn ende was daeroff een gheweldich Heer alsoo lange als sijn wijff van Vyanen leefede. Ende doe sijn wyff van Vyanen starff, doe vercoft de Here van Oesterhout voirs. die heerschappye van Hagensteijn den Heere van Culenborch Heeren Hubrecht Scheinck ende heeren Otten heer van Asperen tesamen, ende deelden de heerschappy tesamen: die Heer van Culenborch die nam Everdinghen ende Hontswijck; die Heer van Asperen die nam dat huys tot Hagenstein, Gaspernweerde ende t Wael