1423-10-26 | Purmerend

R.A.H. Coll Aanw 77 fol 193v/Memoriale Ducis Johannis fol 150v

Jaartallenindex

hertog Johan oorkondt "want wij uijt rechter natuerliken gunsten ende trouwen Johan onsen bastairt, gegeven ende gegonnen hebben, alle alsulcke goede als Willem Eggairt in t leste van sinen live achterliet, ende gelegen sijn in Holland, gelyc als die brieven inhouden en gegripen die hij van ons daerof heeft, des onsen lande nutte ende oirbair waer, dattet huijs tot Purmerende weder begrepen ende opgetimmert worde, so hebben wij voir ons etc Johan voirs etc gelooft ende geloven mit desen brieve, dat wij hem die goede voirs niet wederseggen en sullen, noch wij noch nyemand van onser wegen en sullen ons dier goede kroden of bewinden, of onse hande daeran slaen in eniger wijs, wij en hebben eert Johan voirn. wail voldaen ende vernoecht van sulken gelde als hij an den huyse tot Purmer ende vertymmert hadde of daeran te coste geleecht, daer hij datselve huijs mede gesterckt of gevesticht hadde sonder argelist, des hij ons mit goeder reeckeninge redelic ende besceijdelic sal mogen bewijsen