1407-04-05 | Alkmaar

Cartul Reg van St Jan fol 185

Jaartallenindex

Jan Claessoen oorkondt dat hij in voirtyden vercoft heeft aan Dirc Louweryssoen twee halve weyden utghenomen een vierendeel dat Andries Michielssoen toe hoert in die groote weyde ende ⅛ deel in die cleyne weyde. Ende dit voirn. lant leyt voir seven coeweyde, ende is gheleghen in die vrihede van Alcmair bij Heyloerdyck after die papeghilde lant, ghemeen mit Jacob Horlen kinder, dair lenden van zijn Aecht Wouter Scoutinx wedu an die suutsyde ende an die noirtside, Hughe Bastgens an die oestside. Ende voirt soe heeft mi Dirc Louweryssoen voirsz nu ter tijt angebrocht dat hij dit voorsz lant vercoft heeft broder Jan prior des Reg. klooster buten Haerlem, ende wat waernisse Dirc voirs broeder Jan voirn. van den voorseide lande gheloeft heeft, alsulke waernisse love ic Jan Claesz voirs broeder Jan voirn. mede vast ende stade te houden mit Dirc Louwerysz voirs. een voor al. In kennisse der wairheyt soe hebbe ic hier mijnen zeghel opgedruct