1409 | Heemstede, Schoorl

R.A.H. Coll Aanw 96 fol 99, 99v/Reg Tricushandt Caput Kennemerland no 109

Jaartallenindex

Her Jan van Heemsteden ontfaen van mijnen Heer etc 15 Juni 1412 in den yersten dat dorp van Benthusen, mitten tiende, heerlicheden, hoghe ende laghe, ende anders allen sijnen toebehoeren, alsoo dat Graven van Bloys te besitten plaghen, te houden nae inhout sijnre brieven ende des sijn brieve, beyde van Grave Guijen van Bloys ende Hertoghe Aelbrecht. Item dat ambochtsheerschip van Heemsteden mit allen rechten ende vervalle als andere ambochtsheeren hoir ambochten in Kermerlant hebben ende houden. Item thuijs tot Heemstede mit sijnen toebehoeren ende mit allen den lande datter toebehoert mit recht gheleghen in den ambocht van Heemsteden voirs. Item 45 morghen landts gheleghen in die Lier, ten erffleen, ende des is een brieff van der Keyserinne. Item die hooghe gherechten binnen den huyse van Heemstede ende binnen der uterster graften den voors. huyse toebehoerende, ten erfflien ende des is een brieff van der Keyserinnen. Item sulcke huysinghe ende hofstede mit heemwerff ende anders hoeren toebehoeren als hij staende heeft in den ambocht van Noertich, ende vercreghen waren teghen Heeren Daneel Bonen ten erfflien, ende des sijn brieven van mynre Vrouwen van Hollandt van Cleve, dien hijt van eyghenen goede opdroech anno 1409. Item Ver Lisen made ende Ver Mechteldencamp gheleghen in banne van Heemstede, ende beleghen hebben die Spaerne an die een zyde, ende Her Jan selve mit geestlande an die ander zyde. Item noch 12 maden landts oick liggende an die oestzijde neffens die Sparne. Item die Zwademade alsoe groot ende alsoo cleyn alse Jacops Aerntszoen toebehoeren plach. Item den Outerencamp alsoo groot als die gelegen is aen Diedaertswerf, ten erfleen, ende des is een brieff van mijnre Vrouwe van Hollandt hertoghe Willems moeder, diet van eyghenden erve opghedraghen waert anno 1385 [4 ?]. Item dat ambochtsheerscip van Schoerle mit synen toebehoeren etc ten rechten leen ende des sijn brieven anno 1409