1410~ |

R.A. Utrecht Leenregister Ysselstein 1409 no 1 leen IX (los ingeplakt)

Jaartallenindex

item myn here van Egmonde heeft in voirtyden belieft Jan van der Zevender te vercopen 6 mergen lants ten eyghen, die hij van minen here te leen hielt. Welc lant hij minen lieven here weder geloift heeft te beleggen in Polsbroek, ende van hem te leen t'ontfangen in der vuegen dat hy tander lant helt te leen, daer Steven van der Zevender voir geloift heeft. Item hier op is Stevens meyninge om dat hij geern gequyt wert uter borchtochte als dat sijn neven syns brueders sone copen soude tegen enen man geheten Loeff Hermansz borger t' Utrecht ende myn here in voirtyden aengecomen was van Wouter Dienz ende hy voort gaf Screvel ende Aernt Coppenz 6 mergen lants gelegen in Polsbroec die hij van minen here te leen ontfangen soude in der vuegen als dat toebehoorde. Des soude myn here gunnen ende brieven geven den selven Loeff Hermansz ende sinen wive, dat sij hoer leven lanc bueren souden alle jaer 10 Aernh. gld ut 6 mergen lants gelegen opt oudelant, die Jan van minen here hout tot enen quaden lene ende oft gebuerde dat Jan storve sonder wittachtige geboorte voir Loeff ende sinen wive off dat die 6 mergen aen minen here queme mit enigen recht, so sall myn here mit goeden brieve ........ [?] wesen dat men dan die 10 gld alle jaer weder heffen ende bueren soude ut sulke guede als Jan houdende is van mynen here van Egmonde off van minen here van Gelre gelegen binnen der heerlichede van Ysselsteyn so lange als Loeff off sijn wyff leveden (ongedateerd)