1413-12-31 |

R.A.H. Coll Aanw 72/Memoriale B.A. 1409; Van Mieris IV p 270

Jaartallenindex

hertog Willem oorkondt dat onse goeden luden uten dorpen van Aemstelreveen tot desen dage toe gestoelt ende gedeelt hebben geweest in zeven delen als Butervellert, Roemersdorp, Middeldorp, Smedeman [van Mieris leest: Suredeman], Legmair, Noortveen, en Ottenwael, daer elc deel bisonder of te scote staet bi ryemtalen, als vaneen gesceiden. Ende want onse goede luden voirn. in sulker mate hoir scote, bede en ongelt niet gelden en mogen noch ons ende onser liever nichte jvr Katherine Van Cleve niet dienen en mogen als si plagen te doen, overmits datter veel poorteren geworden syn, ende uten enen deel in dat ander deel metterwoon getogen dair dat een deel van den anderen seer bi veraftert worden ende bescadicht, so sijn wi mit onsen Rade dair up overdragen ende gesloten bi wille ende consente ende onser liever nichte voorn, die die ambochtsheerschip aldaer van ons hout, dat die zeven delen an Aemstelreveen voirs. voirtan zamentlic ende onversceyden allen oncost mit malcander gelden sullen, ponde ponde gelyc, van allen horen goede die sy daer leggende hebben, sonder yements wederseggen. Ende ombieden ende bevelen onsen Baeliu van Aemsterlant ende den scout van Aemstelreveen, dat syt an onsen gemenen bueren voirsz. also bewaren, dat an den betalinge van allen ongelden niet anders en geschie dan voirs. is, want wij 't van enen yegeliken gehouden ende voldaen willen hebben. In oirconde etc gegeven in den Hage op ten Jaersavont