1399-02-13 (1398) |

R.A.H. Coll Aanw 67 fol 67/Memoriale B.M. fol 50

Jaartallenindex

wort overdragen bi mijns heren Rade tussen heren Florens van Alkemade, baelju van Aemsterlandt, van Waterlandt ende van den Zeevanc aen d'een side, ende der stede van Aemsterdam aen d'ander side, roerende van sulken hantvesten als die stede van Aemsterdam van minen heer vercregen heeft van scout ende gerechte te setten binnen Aemsterdam. Dat is te weten dat die stede voirs. Heren Florys, bailju voirs, eeden sullen recht te doen ende te plegen in der baeljuschap als gewoenlijc ende costumelic is, also lange als Dirc Symonszoens eerste bevelinge van den scoutambacht van Aemsterdam dueren sal, dat is te verstaen Paschen e.k. over een jaer. Ende darenbinnen soe sal mijn heer mit sinen Rade na inhouden heren Florijs bevelinge ende der stede hantvesten die voirs. partien scheiden na den besten rechte. Ende waer dat sake dat mijn heer die partien niet en scheidede binnen der tyt voers, so soude elcx van den selven partien staen tot sulken rechte ende bescheide als sij nu op desen tijt staen. Dit is overdragen bi mijns heren Rade