1399-02-16 (1398) |
R.A.H. Coll Aanw 67 fol 68v/Memoriale B.M. fol 51
Jaartallenindex
hertog Albrecht oorkondt want gescil en parlement gevallen ende geschiet is tusschen heeren Gheryt van Heemskerc, sinen magen en hulperen, aen d'een side, Jan Noetaert ende Melijs Jansz en Dirc Willemsz, horen magen ende hulperen aen d'ander side. Ende des beide die voirs. partien eens seggens aen ons gebleven sijn van allen twist ende geschil dat sij onderlinge op malcanderen tot desen dage toe te seggen mochten hebben. Soe hebben wij geseit ende seggen beide die voers. partien onderlinge wail gesoent ende verlijct van allen twist ende geschil die sij tot desen dage toe op malcanderen to seggen mochten hebben op een verclaren, dat is te weten tot wat tiden die voers. partien hoer gebreke aen beiden siden overgeven so willen wij dan onse verclaringe ende goetduncken op alle poincten seggen. Ende ombieden ende bevelen beiden den voirs. partien ende elc bisonder op hoer lijf en goet, dat sij onse voirs. seggen houden en voldoen, en niemand darenboven misdoen noch doen misdoen in enigerwijs