1399-12-16 |

R.A.H. Coll Aanw 67 fol 99v/Memoriale B.M. fol 73, 73v

Jaartallenindex

geloefden in die Raetcamer aen s proostshant van Bergen in Henegouwen tot mijns heren behoef Jacob Wybrantsz ende Florijs van Valkenborch, scouten tot Hoerne, dat sij bi sulker reeckeninge als sij opten voers. date van den voern. dienste deden, bliven willen, ende wes mijn heer in der waerheijt bevinden mach, dat sij brueckigh daerin syn, dat sullen sij minen Heer bi sinen rade beteren in tegenwoordicheyt myns heren Raden. Item quam voer myns heren Rade Claes Tsemmen van Monikedam, ende daechde dat jonge Jan Oetaert, scout tot Aemsterdam, ende die sij vingen binnen der stede van Aemstelredamme, luttike Jan die Wale sinen broeder ende in der vangenisse daer sij en hilden worden him gedaen twee wonden after in die lenden, ende wort geworcht mit enen getouwe daer een stock aen was, ende wort in eenen sack over oever geworpen, ombescult van bruecken ende onverwijst mit mannen of mit scepenenvonnisse. Ende bi deser clage heeft geloeft Claes Tsemnane voers. te bliven ende goet te maken op sijn lyf ende op syn goet, in tiegenwoerdicheyt myns liefs heren Rade

Raden: 1e die proost van Bergen, heer Gheryt van Egmonde, heer Jan van Heenvliet, heer Gijskyn van Diepenburch e.a. Rade en clercken; 2e: die heer van Egmonde, die proest van Bergen, heer Jan van Heenvliet, heer Jan van den Woude, heer Coen van Oisterwyck