1400-01-30 (1399) | Heemskerk

R.A.H. Coll Aanw 67 fol 106/Memoriale B.M. fol 79

Jaartallenindex

item soe is geraemt een maniere ende alinge voirwaerde tussen heren Gherijt van Heemskerck aen die een side, ende heren Florys van Alcmade, ridder, aen die ander side, roerende van alsulcken afterwesen als heer Florijs voirs. heren Gherijt misdaen mach hebben, dat te weten dat sij dat bliven soude aen tween segluden, die heer Gherijt voirs. daertoe nemen soude, als Symon van Zaenden ende Gysbrecht van Rietvelt, ende aen tween segluden die heer Florys voirs. daertoe nemen soude, als Jan van den Woude ende Symon van der Schuijr. Ende des sullen die vier segluden voirs. eendrachtelic hoir seggen seggen van den afterwesen voirs, ende heer Florys voirs. heren Gherijt voirn. beteringe te doen na hoeren goetducken ende in geenrewijs daerin roeren van den huse van Heemskerc [Marquette] mit sinen toebehoren. Ende wes die 4 segleden voirs. van den voirs. afterwesen seggen sullen, dat sullen si aen beiden siden houden en voldoen gelikerwijs of dat huijs van Heemskerck op dese tijt heren Florijs voirs. niet toebehoirde. Kunnen zegslieden het niet eens worden dan zullen zij een overman kiezen. En wanneer die segluden of overman mitten segluden als voirs. is hoir seggen geseit hebben ende die partijen voirs gesoent syn, wil dan heer Gheryt voirs. hebben dat huijs voirs mit sinen toebehoren 14 dagen daerna, dat sal him heer Florys dan overgeven bi den segluden om sulc gelt als die seggers heren Florijs voirs. dairof toe vinden sullen. Ende dair sal heer Gherijt heren Florys of vernoegen sonder yet van den afterwesen te warderen ende in allen manieren of sij nije gescille jegens malcanderen gehadt hebben etc