1402-11-25 |

Reg H. Geest Naaldwijk fol 70/Copie v.d. Marel p 142

Jaartallenindex

Natalien Claes Backersdochter testament. Wi Kerstant Coppartz ende Hildebrant Symonsz doen cont allen luden, dat wi waren Heylich Geestmeesters tot Naeldwijk in dien jaer doe ghecoft wort van des H. Gheest weghen voirscr jeghens heren Hughen Backer, priester, cureyt tot Egmonde, ¼ deel van 3 morgen lants gelegen in den ambocht van der Watering jeghens den werf daer Jacop Toude op plach te wonen noortwarts over die Swet. Tot welken coep Natalye Claes Backersdochter gaf also veel an ghelde voir welc ghelt hoor ghelooft wort van des H. Gheests weghen voirs. 1£ Holl payments jaers durende tot haren live te betalen alle jaers tot Kersavont. Ende na hare doot sel die H. Geest voirs. op hoor jarichtijt doen deelen al den armen op t kerchof tot Naeldwijc witte brode van 2 penninghen, ende dat sel duren tot ewighen daghen. Ende want dit waar is ende wi selve ghenen zeghel en hebben so hebben wi gebeden heren Heynric van Naeldwijc, ridder, mairscalc van Noorthollant, dat hi desen brief voir ons bezeghelen wille met zinen zeghel (vgl 1402-11-16, 1402-11-25, 1404-09-22)