1455-01-02 |

Inv Arch Abdij Egmond no 846 fol 84

Jaartallenindex

wy Jacob Eelman, prior, ende heer Arent van Hemert, monic ende doctor in den gheesteliken rechte, ghedeputeerden van onser ghemeenen convent des Godshuus van Egmonde, doen kond alle luden dat wij van allen alsulken aentichten ende ghescil als wij tot desen daghe toe ghehad hebben met Bertolmeus van Prusen, baliu van Berghen, te weten van afterstallighen renten die onse convent hem eyschende was, ende van boeten ende broeken die hij ons wederom eyschende was, roerende van versumenisse van tynse in der heerlichede van Berghen, vriendelic ende minnetlic verenicht ende overghecomen sijn ende quytscelden malkanderen alinghe ende al gheheel van den saken vors. mit desen brieve beseghelt mit uthangende seghelen des prioraetscips des Godshuus van Egmond. Ende ic Bertolomeus van Prusen, beliu van Berghen, want ic metten gheesteliken ende eerbaren heeren van den convent des Goodshuus van Egmond also alst vors. is overghecomen ende verenicht bin van den aentichte ende saken vors, soe heb ic in ghetughenisse der waerheit minen zeghel hyer mede anghehangen. Oorspr. Inv no 931: zegels van de prior en van Bartelmeus van Prusen (een klimmende leeuw)