1464-05-02 | Niedorp

R.A.H. Coll Aanw 232 fol 300v/Mem. van Swieten dl I no 117

Jaartallenindex

upten voers. dach soe was by den Hove van Hollant Claes die Jager gracie gedaan ende verdragen van den puncten him by sententie arbitrale opten dach van huyden by den voirs. Hove overgeseyt, te weten dat hij opten Heiligen Sacramentsdach naestcomende, comen soude in de kerke tot Nyedorp, hebbende in zijn hant een barnende kaerse, zeggende ende bekennende openbair voir den volcke ende in die jegenwoordichede van de schout en scepenen aldaer, dat alsulke onbehoirlycke en onbetamelycke woorden als hij in versmadenisse van den voirg. Hove ende in cleynachticht van den hoicht myns genad. heren gesproken heeft, dat dat bij hem geschiet is uut hetten van bloede ende als qualick bedacht ende bidden daeromme den scout en schepenen aldaar in den name myns genad. Heren ouc vergiffenisse. Ende des soe sal die voirs. Clais in recompensatie van dien doen stellen een wassenkaertse wegende 6£ up ten H. Sacramentsdach naestcomende omme die octave lang an den H. Sacramente te mogen bernen. Ende mits desen soe is de voers. Clais bij de voors. Hove ende tot sonderlinge bede en begeerte van enige zyn vrunden en magen van den voirs. puncte gracie gedaan (zie op de Wilde)