1456-02-09 |

Reg H. Geest Naaldwijk fol 17/Copie v.d. Marel

Jaartallenindex

ic Wouter van Heemskerck oorkondt dat ic by der gratien Gods in gesonden live, machtich mijner vyf zinnen, mit goeder voersienicheyt ende ripen berade ghegheven hebbe ende gheve puijerlic om Gods wil, tot behoef der armen menschen, den H. Geest tot Naeldwijck 5 hont lants ende 24 gaerden gelegen in den ambacht van Naeldwijck, ende nu ter tijt in huyrware bruuct Heynric Henyricsz, ende leghet gemenghder aerden ende vaeren mit den capittel van Naeldwyck. Ende des sullen die H. Geestmeesters ter stede voers. jaerlixe tote ewygen daghen op onse jaerghetide in salicheijt onser zielen deelen den armen menschen als ter selver steden gewoenlic is. Ende weten dat men Otten mijns lieven zoens was van Heemskerck welcken sielen God genadich zij jaerghetide doen ende bedelen sel op St Ponciaen des martelaersavondt, alsoe lange als ic Wouter voirs. ende Katherijn van Hokelem van Akoy, myn lieve wijf, beyde in levende live zyn. Met tot wat tyden enich van ons beijden oflivich wort soe sel men onze jaerghetide houden ende bedelen op tenselven dach ons stervens. Ende ter laetster doel van ons beyden voirs sel ment overt houden ende bedelen tot ewyghe daghen op ten sterfdach des ghenen die laetste van ons oflivich wort etc. Item Katheryn van Hokelem van Akoy Wouters wijf leefde langher dan Wouter dede, ende stierf dieselve Katheryn int jaer ons Heren 1464 op St Katherinendach