2 resultaten

1434-1435~ (1) |

R.A.H. Coll Aanw no 43 fol 134v, 144-148/Reg EL 4 fol 35-36, 37-38, ingestoken papier
Jaartallenindex

(ongedateerd ingestoken papier in EL 4 tussen fol 35 en 36) Dit is antwoerd van mynre genadiger Vrouwen wegen van Beijeren op sulke punten van gebreken als mynre Vrouwen genaden van Holland bij haren Rade ende vrienden in eenre cedelen overgelevert hebben, van des haere genaden vriende becroonende syn, dat hem geschien soude aen haren goede, die sij van hertoge Willem sal. ged. gecregen hebben, gelegen in den lande van Arkel, die mijn genadige vrouwe van Beyeren voirs. besittend is, gelyck hier na bescreven staet.: 1) in den yersten alsoe als Jan van Heerler in een cedel overgegeven heeft ende hem beclaget dat mijn genad. Vrouwe van Beyeren ende hair dienres hem nemen die dagelixe heerlicheyden van Oesterwijc mitten tienden, tynsen ende exeisen, soe is een antwoirde van mijnre genadiger vrouwen voirs. op die voirs. punten dat Jan voirs. die heerlicheijden ende goede voirs. heeft vercregen van hertoge Willem van Beyeren sal. ged, om dat voirs. Jan mitten sinen Gornichem den heer van Arkel ontvreemden ende brochten aen hertoge Willem voirs, des cortelics daerna die joncheer van Arkel die stadt van Gornichem crafteliken denselven Jan voirs. ende sine medeplegers afwan, diese hertoge Willem tier tijt bevolen hadde, soe sij hem daeraen gehulpen hadden als voirs is, ende sijse versuemden ende verloren, dair sij nochtan grote menichte van volke hadden etc, dair die joncheer van Arkel voirs. die stadt voirs. den heer van Arkel sinen vader weder overgaf mit den landen voirs, soe hij des quijt geworden was als voirs is, des doe die heer van Arkel voirs. hertoge Reynout van Gelre die voirs. stadt ende landen vercoft ende leverde, ende die hadde ende besat bet dan 3 jair lanck, ende dairna vercoft hertoge Reynout Gorinchem mitten scependom ende alle goeden daer toe behorende van outs weder hertoghe Willem van Beyeren voirs soet hem mitten sweerde ofgewonnen was, des hij doe ter tijt (zie volgende)

1434-1435~ (2) |

R.A.H. Coll Aanw no 43 fol 134v, 144-148/Reg EL 4 fol 35-36, 37-38, ingestoken papier
Jaartallenindex

(vervolg) dit geschiet was heren Aernt van Leijenbergh die doe sijn drossaet tot Gornichem was enen brief scriven dede, dair hij hem in deed bevelen van sijnre wegen aen te tasten alle die goede die der heerlicheijd van Arkel toe te behooren plagen, want hij dair niemant niet aen en bekenden soe hij die van nijes ende anderwerven gecoft hadde, ende Jan voirs. ende sijn medeplegers die stadt ende landt versuemt ende verloren hadden gelijck voirs. is, en gelijck die voirs. brief des coeps dat inhout ende claerliken bewijst, ende hier na een tijt geleden doe onse genadige Heer Hertoge Jan van Beyeren sal. ged, in der suoene tot Woudrichem bededingt wert, dat hij Gornichem mitten lande van Arkel in kreech ende hebben soude, doe taste men alle goede aen ende bruijct die in alre maten gelyck se die heeren van Arkel tevoeren te bruken plagen, overmits dat Jan van Heerler en anderen sijn medegesellen dat aen hertoge Willem voirs. gebrocht hadden als voirs. is, ende hierom heeft hertoge Jan die goeden voirs. sinen tijt beseten ende gebruijct, ende heeft onser genadiger Vrouwen van Beyeren voirs. dairaen verlijftucht, welcke lijftucht mijns heeren genade van Bourgoignen ende oec mijns heren genaden van Brabant sal. ged. haer geconfirmeert ende gevesticht hebben ende geloeft daerin te houden ende te stercken tegen enen yegelycken die haerne Genaden daerin hijnderen of deeren wilde. Ende overmits dies soe heeft mijn genadige Vrouwe van Beyeren die goeden tot deser tijt toe beseten ende gebruyct van enen yegelyken, ende hopen ende meynen dat myns Heren ged. v. Bourgoignen ende syn hoge wijse Rade ummer billic ende redeliken sal duncken dat sij die goede voers. rustelic ende vredelic ende ongehijndert van enen ygelic hebben ende gebruken sal na utwisinge haere lyftucht brieve ende confirmatien voirs, hare genade dairin niet hijnderende enige zuoenen of ander saken die men dair op ordineren mochte aengesien, want alle voirs. saken voer dieser veeden geschiet syn en in genen veden mogelyc geruert sullen wesen