1421-04~ |

R.A.H. Coll Aanw 76 fol 372/ Memoriale in Beyeren anno 1421 fol (ingestoken ?)

Jaartallenindex

hertog Johan. Laten u weten met desen brieve onsen scout, burgemeesters, scepenen en Rade van Monickendam ende van Yedam, ende elken bisonder, hoe dat heer Gheryt van den Zijle onse vyande geweest heeft ende dagelics onse archste doet, ende mit recht ende vonnisse ballinge ons lants geleecht is, alsoe dat wij mit onsen Rade ende steden overdragen ende gesloten sijn, dat men t huijs te Purmerende neder leggen ende breken sal ter bester orber, ende dairaf een ander slot doen maken in onsen lande van Oest Vrieslant daeraf onsen bailju van Aemsterlandt en van Waterland u voer van onser wegen bevolen heeft, ende wij u oec na mit onsen brieven geschreven hebben, dat ghi u tymmerlude ende een taxe ende getalle van luden gisteravont tot Purmerende hebben soudt, om daertoe te helpen dattet huys voirs neder geleecht worde als voirs. is, twelck wij verstaen dat gij beiden verseten hebt, ende overhorich dair in sijt, dat ons seer vreemde heeft ende verwondert, wairom wij u allen ernst noch ontbieden ende bevelen dat ghi sonder vertreck gesien des briefs mit eenvoudige heervaert trect tot Purmerende ende d'best ende den orber doet tot den breken des huijs voirs, gelyck anders onsen vriende die daer sijn of comen sullen, dit en laet in geenrewijs also lief als wij u zyn [zonder datum, volgt op een akte van 1421-04-21, tesamen op één papier ?]